રાગ - ગરબી
પદ - ૧
લટકાળો લટકંતો રે આવે, મોહન મોરલી વાતો રે. ટેક.
સખાને સંગે અતિ ઊછરંગે, ગીત મધુરાં ગાતો રે. લટ ૧
કેસરીએ વાઘે કસુંબલ પાઘે, કેસર રંગમાં રાતો રે. લટ ૨
ફુલડાંના તોરા ગજરા ને ટોપી, ફુલડાંને હારે ફુલાતો રે. લટ ૩
નિષ્કુળાનંદનો સ્વામી શામળીયો, આવે અમીરસ ર્પાંઇો રે. લટ ૪
પદ - ૨
શામળીયો સ્નેહનો બાંધ્યો, આવે છે અલબેલો રે- શામ ટેક.
રંગમાં રાતો ને વાંસલડી વાતો, છોગાળો છેલછબીલોરે. શામ૦ ૧
અતિ પ્રસન્નવદન વાલાનું, અળવે ભર્યો અલબેલોરે. શામ૦ ૨
દર્શન દેવાને કાંઈક કેવા, રસબસ કરવા રસિલોરે. શામ૦ ૩
નિષ્કુળાનંદનો સ્વામી શામળીયો, આવે વાલપશું વહેલોરે. શામ૦ ૪
પદ - ૩
છબીલાની છબી જોઈને, મોહી રહ્યું મન મારું રે. ટેક.
નેણાં વિશાળ ને વાણી રસાળ, તે પર તન મન વારુંરે. છબી૦ ૧
વા’લાનું વદન સુખનું સદન, શોભે છે સુંદર સારુંરે. છબી૦ ૨
જીવન જોઈ હું મનમાં મોહી, મીટે મટકું ન મારુંરે. છબી૦ ૩
નિષ્કુળાનંદના નાથને નિરખી, અંતરમાં ઉતારુંરે. છબી૦ ૪
પદ - ૪
છોગાળા તારાં છોગલાં ઊપર, વાલમજી જાઉં વારી રે. ટેક.
નટવર નાગર સુખના સાગર, મન માન્યા મોરારી રે. છોગા૦ ૧
કા’ન ગોવાળ ને વાંસળીવાળા, તમે મીરાંત્ય છો મારી રે. છોગા૦ ૨
નંદનાલાલા લાગો અતિ વાલા, ગુણવંતા ગિરધારી રે. છોગા૦ ૩
નિષ્કુળાનંદના સ્વામી શામળીયા, હું છું દાસી તમારી રે. છોગા૦ ૪