રાગ - ખમાજ
પદ - ૧
રૂડા લાગો છો રાજેન્દ્ર મંદિર મારે આવતા રે. રૂડા ટેક.
જરકસીયો જામો હરિ પહેરી, માથે બાંધી પાઘ સોનેરી;
ગૂઢો રેંટો ઓઢી, મન લલચાવતા રે રૂડા૦ ૧
હૈડે હાર ગુલાબી ફોરે, ચિત્ત મારું રોકી રાખ્યું તોરે;
ગજરા કાજુ બાજુ મન મારે ભાવતા રે. રૂડા૦ ૨
કનક છડી સુંદર કર લઈને, ગજગતી ચાલો હળવા રહીને;
ચિત્તડાંને ચોરો છો મીઠું મીઠું ગાવતા રે. રૂડા૦ ૩
પ્રેમાનંદના નાથ વિહારી, જાઉં તારા વદનકમળ પર વારી;
હેતે શું બોલાવી તાપ સમાવતા રે. રૂડા૦ ૪
પદ - ૨
વહાલી લાગે છે વરણાગી તારી વાંકડી રે - વહાલી ટેક.
લલિત ત્રિભંગી સુંદર શોભે, સુરનર મુનિના મનને લોભે;
ચાલો ચાલ ચટક્તી, પહેરી ચાખડી રે. વહાલી૦ ૧
સુંદર હસિત વદનની વાણી, સુણતાં વ્રજ વનિતા લલચાણી;
જોઈને મોહી અણિયાળી ચંચળ આંખડીરે. વહાલી૦ ૨
નવલ મનોહર સુંદર છેલા, ઓરા આવોને અલબેલા;
મળીયે મોહન બાંધી બાંયે રાખડી રે. વહાલી૦ ૩
શ્રી ઘનશ્યામ છબીના ધામ, પ્રેમાનંદ ભજે આઠો જામ;
જોયાની લાગી છે નિશ દિન ધાખડી રે. વહાલી૦ ૪
પદ - ૩
તારી બાનકની બલિહારી મારા નાથજી રે. તારી૦ ટેક.
સુંદર રૂપ કહ્યામાં નાવે, શેષ સહસ્રમુખ પાર ન પાવે;
કોટિક કામ લજાઈ જોડે હાથજી રે. તારી૦ ૧
મોહ્યું મન મુખને મરકલડે, ગિરધરજી ગમીયા છો દીલડે;
ક્ષણું ન મેલે સાગર તનયા સાથજી રે. તારી૦ ૨
રૂપ શીલ ગુણ રસના સાગર, તરુણ કિશોર સદા નટનાગર;
વ્રજ વનિતાના પ્રાણજીવન સુખપાથજી રે. તારી૦ ૩
કરુણા રસમય જોવું હસવું, કરુણા કરી જન ઊરમાં વસવું;
પ્રેમાનંદ નિત્ય ગાવે એ ગુણ ગાથજી રે. તારી૦ ૪
પદ - ૪
વારે વારે જાઉં વહાલાજી તારે વારણે રે. વારે૦ ટેક.
આદિપુરુષ ઈશ્વર અવતારી, કરુણા રસમય મૂર્તિધારી;
પતિતપાવન પ્રગટ્યા આજ અમ કારણે રે. વારે૦ ૧
નરનારી અગણિત અથડાતાં, ભવસાગરમાં ડુબકાં ખાતાં;
બળવંત બાંહ્ય ગ્રહીને કાઢ્યાં બારણે રે. વારે૦ ૨
અધમ ઊધારણ ધામના ધામી, બિરુદતમારું સદાયે સ્વામી;
કીધું સત્ય કળીમાં બહુજન તારણે રે. વારે૦ ૩
મળીયા પુરુષોત્તમ એમ જાણી, અચળ આસરો ઊરમાં આણી;
પ્રેમાનંદ ઠરીને બેઠો ઠારણે રે. વારે૦ ૪