રાગ ગરબી
પદ - ૧
એકલડાં કેમ રે’વાય તમ વિના વા’લાજી, મંદિરીયું ખાવા ધાય તમ૦૧
હૈયાની કોણ પૂરે હામ- તમ૦ મારે હાથ ન લાગે કામ. તમ૦ ૨
કોણ જાણે દીલની વાત- તમ૦ સુખ ના’વે દિને રાત. તમ૦ ૩
મારી જુગ તુલ્ય રજની જાય- તમ૦ મહા દુઃખ છે હૈયા માંય. ત૦ ૪
બ્રહ્માનંદના સ્વામી જાણ - તમ૦ હું કેમ કરી રાખું પ્રાણ. તમ૦ ૫
પદ - ૨
મરમાળા મારેમો’લ આવો અલબેલા, છોગાળા સુંદર છેલ. આ૦ ૧
હુંતો સજી રહી શણગાર- આવો૦ મારા પ્રાણ તણા આધાર. આ૦ ૨
હુંતો જોઈ રહી છું વાટ- આવો૦ મેં ખાંતે ઢાળી ખાટ. આ૦ ૩
જાણો છો રસની રીત- આવો૦ પાતળીયા તમ શું પ્રીત. આ૦ ૪
બ્રહ્માનંદ કહે મચ્યો ખેલ- આવો૦ રંગડાની કરવા રેલ. આ૦ ૫
પદ - ૩
નયણાંને ચાળેનાથ, પ્રીતમ પાતળીયા, મન ફરે તમારે સાથ પ્રીત૦ ૧
કામણીયાં કીધાં કોય- પ્રીત૦ વણ દીઠે સુખ નવ હોય. પ્રીત૦ ૨
મારે હાથ ન લાગે કામ- પ્રીત૦ શું કીધું સુંદર શ્યામ. પ્રીત૦ ૩
કારણ છે મોરલી માંય- પ્રીત૦ સાંભળતા સુધ વિસરાય. પ્રીત૦ ૪
બ્રહ્માનંદના સ્વામી છેલ- પ્રીત૦ હું આવીશ તારે ગેલ. પ્રીત૦ ૫
પદ - ૪
આવોને રમીએ આજ, જગના જીવનજી; રસમાં ચતુરાછો રાજ-જ૦૧
સેજલડી બની છે સાર- જ૦ મોજ માણોને નંદકુમાર. જ૦ ૨
મુજ દાસી ઊપર મહેર- જ૦ આવી કરોને લીલા લહેર. જ૦ ૩
મારું તનડું ટાઢું થાય- જ૦ હૈયામાં હરખ ન માય. જ૦ ૪
બ્રહ્માનંદ કહે વારંવાર- જ૦ તમ સાથે લાગ્યો પ્યાર. જ૦ ૫