લગની લાગી રે મારે લગની લાગી (૪)

પદ - ૧

લગની લાગી રે મારે લગની લાગી;

સખી શામળીઆ સંગાથે મારે, લગની લાગી. ટેક૦

મીઠે સ્વરે મોહનજીની, મોરલી વાગી;

સાંભળતામાં ચટકી લાગી, ઝબકી જાગી. લગની લાગી૦ ૧

વૃંદાવનની વાટે ચાલી, કુળ લજજા ત્યાગી;

વાંસળી વગાડતાં જોયા, શ્યામ સોહાગી. લગની લાગી૦ ૨

રસિયા સંગે રમતાં સર્વે, ભ્રમણા ભાંગી;

મેં તો અખંડ સોહાગ લીધો, મુખડે માગી. લગની લાગી૦ ૩

મુક્તાનંદ કે’ પલ એક ન્યારો, ન મેલું વા’લો;

શિરને સાટે કયાંથી મળે, નંદનો લાલો. લગની લાગી૦ ૪

પદ - ૨

ગિરધારી રે સખી!, ગિરધારી,

મારે નિરભે અખુટ, નાણું ગિરધારી. ટેક૦

ખરચ્યું ન ખૂટે એને, ચોર ન લુંટે;

દામની પેઠે એ ગાંઠે, બાંધ્યું નવ છૂટે. ગિરધારી૦ ૧

અણગણ નાણું સંચી અંતે, નિરધનીયાં જાયે;

તેની પેઠે નિરભે નાણું, દૂર ન થાયે. ગિરધારી૦ ૨

સંપત વિપત સર્વે, સ્વપ્નું જાણું;

હરિના ચરણની સેવા, પુરણ ભાગ્ય પરમાણું. ગિરધારી૦ ૩

મુક્તાનંદ કહે મોહનવરને ઊરમાં ધારી;

હવે દુઃખ ને દારિદ્ર થકી થઈ રહી હું ન્યારી. ગિરધારી૦ ૪

પદ - ૩

સુખ પામી રે સખી!, સુખ પામી;

હું  તો શામળીયાને શરણે, જાતાં સુખ પામી. ટેક૦

શરણાગતને પાળે સદા, બહુનામી;

મારે હરિનો ઊપર હાથ, કશી ન રહી ખામી. સુખ પામી૦ ૧

તપ ને  તીરથ મેં  તો, કાંઈ નવ કીધું;

મારે ઘેર બેઠાં શ્યામ થકી, કારજ સીધું. સુખ પામી૦ ૨

સંસારીનું સુખડું જુઠું, આવે ને જાયે;

હરિનો અખંડ સોહાગ, કેદી કાળ ન ખાયે. સુખ પામી૦ ૩

મુક્તાનંદ કે’ હરિ હરિજનની, ગતી છે ન્યારી;

તેને દેહદરશી દેખે, પોતા જેવા સંસારી. સુખ પામી૦ ૪

પદ - ૪

છેલ છોગાળો રે, મીઠી મોરલીવાળો;

મારે મંદિરયે પધારે, નિત્ય છેલ છોગાળો. ટેક૦

હસતાં હસતાં મુજને દેખી, આનંદ પામે;

એની કરુણાની દૃષ્ટિ, સર્વે દુઃખડાં વામે. છેલ છોગાળો૦ ૧

મોતીડાંની માળા પે’રી, મલપંતો આવે;

ગાવું ત્યાં સંગાથે મારે, પ્રેમ શું ગાવે. છેલ છોગાળો૦ ૨

મ વાલો વશ કીધા, મુજને વાલે વશ કીધી;

આમાસામી પાનબીડી, દીધી ને લીધી. છેલ છોગાળો૦ ૩

મુખડેથી તંબોળ મુજને, મહેર કરી દીધો;

મુક્તાનંદ કહે મોહનસંગે, લાવ ઘણો લીધો. છેલ છોગાળો૦ ૪