પૂર્વછાયો-
હવે ભક્ત હાલારના, વળી કહું કચ્છ સમેત ।
શુધ્ધ મને જે સાંભળે, તેને થાય હરિમાં હેત ।।૧।।
મીઠાબોલા ને મોબતી, હૈયે હેત અપરમપાર ।
પ્રીત પ્રગટ પ્રભુશું, કરૂં તેનાં નામ ઉચ્ચાર ।।૨।।
ચોપાઇ-
ભક્ત ગુણવંતા છે ગોંડલે, ભજે પ્રભુ મન નિરમળે ।
પુરપતિ ક્ષત્રિ હઠીભાઇ, કરી હરિ ભજીને ભલાઇ ।।૩।।
ક્ષત્રિ ભક્ત ડોસોભાઇ કહીએ, એહ આદિ બીજા બહુ લહીએ ।
જીવરામ પ્રાગજી સુતાર, ભક્ત જોધો એ જાતિ ઉદાર ।।૪।।
વિપ્ર જેઠો મીઠો ને ભાઇજી, ભક્ત શેઠ રૂડો રાઘવજી ।
કડિયા રતનો અજો નારાયણ, હરભમ હરિપરાયણ ।।૫।।
વાઘો વાલો કડવો કુંભાર, અર્જણ દેવશી લખો ઉદાર ।
નાથો વાલો લુહાર જેરામ, સઇ ગગો નારાયણ નામ ।।૬।।
આંબો કાનો જન જણસાળી, શેખ જીવણ યવન વળી ।
એહ આદિ છે જન અપાર, રહે ગોંડલ ગામ મોઝાર ।।૭।।
ભક્ત ભાટિયો હીરો છે નામ, હરિજન દ્વિજ પ્રજારામ ।
એક વેરાગી તુલસીદાસ, એહ આદિનો મોવૈયે વાસ ।।૮।।
નથુજી ઉદોજી જેઠીભાઇ, રૂડા ભક્ત કહીએ ક્ષત્રિમાંઇ ।
ભક્ત હરજી ઝીણો કુંભાર, વિપ્ર ગણેશ લાલો ઉદાર ।।૯।।
એહ આદિ જે જન કહેવાય, વસે ગામ નાગડકામાંય ।
દેવો ઓઝો કણબી કરમશી, ભજે હરિ વેરીગામ વશી ।।૧૦।।
ક્ષત્રિ ભક્ત ડેરીયે માનજી, વડારે વોરો વાલો જનજી ।
કાજુ ભક્ત કાલાવડમાંઇ, ખતરી તે જાદવજીભાઇ ।।૧૧।।
અતિ ઉદાર હેતુ હોંશિલો, જેનો ભાઇ કેશવજી વાલો ।
ક્ષત્રિ ભક્ત ખિરસરામાંઇ, લાખોજી ને હરિજન બાઇ ।।૧૨।।
કણબી શવદાસ રૂપાંબાઇ, ક્ષત્રિ લાખોજી રહે વડામાંઇ ।
હડમતિયે ભગો વણિક, સુખપુરે દમો ભકત એક ।।૧૩।।
ક્ષત્રિભક્ત કાયોજી લૈયાળે, વૈશ્ય રતનો જીવો ઇટાળે ।
હરજી વીરજી ભક્ત સુતાર, જન રામજી હીરો કુંભાર ।।૧૪।।
ક્ષત્રિભક્ત કાંથડજી વળી, એહ આદિ રહે વણથળી ।
હરિજન સોની રાઘવજી, લીધા પુંજે ભગવાન ભજી ।।૧૫।।
ભક્ત એક છે લાધો સુતાર, વસે વણથળી મોટી મોઝાર ।
ક્ષત્રિભક્ત રૂડા જગુભાઇ, ઘરે હરિજન નાનીબાઇ ।।૧૬।।
હરિભક્ત રૂપાળીબા નામ, એહ આદિ ભક્ત મેડીગામ ।
મોડા ગામમાંઇ મોટા ભક્ત, ક્ષત્રિ રણમલજી વિરક્ત ।।૧૭।।
દાજી મોનજી ને બાપુભાઇ, ભક્ત ફલજી સુજાંજીબાઇ ।
જલો રાવળ રૂપાળીબાઇ, એહ આદિ ભક્ત મોડામાંઇ ।।૧૮।।
ભક્ત મેઘો નારાયણ નાનજી, મુળજી વિરજી ને રામજી ।
વસતો લાધો સુતાર લહીએ, હરિભક્ત લાડુબાઇ કહીએ ।।૧૯।।
ફલજી મનુજી હરિજન, ક્ષત્રિ કુળે એ ભક્ત પાવન ।
સોની ગોવો અજોભાઇ કહીએ, એહ આદિ છે ભક્ત અલૈયે ।।૨૦।।
ક્ષત્રિભાઇજી રાઘોજી દાજી, વિપ્ર ભક્ત વાલો જાદવજી ।
લાલ રામ વૈશ્ય હરિજન, વસે શેખપાટમાં પાવન ।।૨૧।।
કડિયો ભક્ત ઉકો ઓઘો જાણો, જીવો જેરામ ડાયો પ્રમાણો ।
એહ આદિ જે ભક્ત સુંદર, ભજે હરિ રહે નવેનગર ।।૨૨।।
લાલો કુંભાર અરજણ સઇ, ભજે પ્રભુ જોડીયામાં રઇ ।
ભલા ભક્ત છે ભાદરે ગામ, સુતાર વસતો ભાઇ રામ ।।૨૩।।
વસરામ માવજી રણછોડ, નારાયણ રાજો જન જોડ ।
ગંગાદાસ ને શવજીભાઇ, હરિજન એક હરિબાઇ ।।૨૪।।
એહ આદિ છે ભક્ત સુતાર, દેવો ડોસો કણબી ઉદાર ।
દ્વિજ મુળજી સુંદરજીભાઇ, ક્ષત્રિ કાનજી ને નથુનાઇ ।।૨૫।।
એહ આદિ જે ભક્ત અપાર, વસે ગામ ભાદરા મોઝાર ।
હીરો ડુંગર ભક્ત સુતાર, ક્ષત્રિ રવો કેસિયા મોઝાર ।।૨૬।।
હરિજન પ્રેમજી વણિક, ધ્રોળ મધ્યે એ ભક્ત છે એક ।
ભક્ત નાયો કાનજી ઉદાર, વેલો ગોવો માંડણ કુંભાર ।।૨૭।।
જેરામ ને એક રાજબાઇ, શા દેવશી ધુળકોટમાંઇ ।
ભક્ત કણબી લખમીદાસ, ગર રણમલ ઘુનડે વાસ ।।૨૮।।
આમરણ્યમાં આણંદિબાઇ, જેની પ્રીત અતિ પ્રભુમાંઇ ।
દ્વિજ ભક્ત ગોવિંદજી ભેલે, ભક્ત વજો બોરિચો રહે બેલે ।।૨૯।।
ક્ષત્રિ ભક્ત છે બેચરભાઇ, આસો ભાઇજી બગથલામાંઇ ।
કણબી ગણેશ ને માનુબાઇ, પ્રેમીભક્ત પિપળિયામાંઇ ।।૩૦।।
વાગડ દેશમાં વાંઢિયું ગામ, તિયાં ભક્ત બ્રાહ્મણ પાંચો નામ ।
લાધો રામો ભરવાડ જોડ્ય, લુવાર રણમલ ચિતરોડ્ય ।।૩૧।।
ભક્ત ઠક્કર કચરો નામ, પદ્મસિ આદિ આધુઇ ગામ ।
રામજી ત્રિકમ વસરામ, ભક્ત લુવાણા ચોબારી ગામ ।।૩૨।।
બાઇ એક મોટાં હરિભક્ત, જેને જુઠું થઇ ગયું જક્ત ।
ભક્ત મનજી દેવો લુવાણા, કંથકોટે એ ભક્ત કહેવાણા ।।૩૩।।
ભક્ત વાઘો ને પાંચે ઠક્કરે, ભજયા હરિ ગામ મનફરે ।
ઠક્કર રામદાસ ને કચરો, ભક્ત મુળજી શા વાઘો ખરો ।।૩૪।।
જેઠો જેરામ કર્મણ લુવાર, એહાદિ ભચાઉ મોઝાર ।
ક્ષત્રિભક્ત લાધોભાઇ કહીએ, અદોભાઇ કલ્યાણજી લહીએ ।।૩૫।।
રામસિંહ રાયધણ જેહ, જેતમાલ આદિ જન તેહ ।
મોટાં ભક્ત એક માનબાઇ, જેને પ્રીત અતિ પ્રભુમાંઇ ।।૩૬।।
બાઇ બાઇજી કરણીબાઇ, ભક્ત એક મેઘરાજભાઇ ।
એહાદિ જન કહીએ અપાર, ભક્ત રહે ધમડકા મોઝાર ।।૩૭।।
હરિભક્ત સુતાર વશરામ, એહાદિ જન દુધઇ ગામ ।
વિપ્ર ભક્ત જેઠો કેશવજી, સતસંગી સુતાર રવજી ।।૩૮।।
ભક્ત ઠક્કર કેશવજી નામ, એહાદિ રહે ચાંદરાણી ગામ ।
માવજી મુળજી ને વાલજી, ભાણિરે ખોખરે હરિ ભજી ।।૩૯।।
દ્વિજ ભક્ત કચરો છગન, રૂડાં રાજબાઇ હરિજન ।
ભક્ત જેઠી ખીમજી સંઘજી, વસે અંજારમાંઇ વાલજી ।।૪૦।।
ભક્ત ઉકોશા આદિ કહેવાય, વસે તેતો ગામ તુણામાંઇ ।
દ્વિજ પુંજો દેવેશ્વર કહીએ, સુતાર પુરૂષોત્તમ લહીએ ।।૪૧।।
એહ આદિ જે જન કહેવાય, વસે ગામ તે મુંદરામાંય ।
ક્ષત્રિ ભક્ત એક મંકુબાઇ, રહે કાલાઘોઘા ગામમાંઇ ।।૪૨।।
ભક્ત શેઠ રતનજી નામ, એહાદિ જન જરફરે ગામ ।
ભક્ત સુતાર છે મેઘોભાઇ, હરિજન માતા મેઘબાઇ ।।૪૩।।
દેવશી ટોપણાદિ ખતરી, હરિ ભજી ગયા ભવ તરી ।
ભક્ત લુવાર છે વશરામ, સોની લાલો રાઘવજી નામ ।।૪૪।।
શા સુંદરજી ચાંપશીભાઇ, એહાદિ જન માંડવીમાંઇ ।
મેપો થોભણ ભક્ત સુતાર, કાનુબાઇ ને જીવો ઉદાર ।।૪૫।।
કુળે સહિત ભક્ત પાવન, વસે ડોણ્ય ગામે હરિજન ।
હરિભક્ત દામજી સોનાર, વસે ગોધરા ગામ મોઝાર ।।૪૬।।
દ્વિજ મુળજી ને દયારામ, એહાદિ જન કોટડી ગામ ।
ભક્ત સુતાર ભીમજી રવજી, હરિજન તે હરભમજી ।।૪૭।।
ભક્ત બાઇ જેઠી અજુ નામે, વસે તે કાળાતળાવ ગામે ।
ઘણેણીયે ભક્ત છે રવજી, થયો સુતાર પાર હરિ ભજી ।।૪૮।।
નેતરામાં શવજી સુતાર, કર્યો સતસંગ સમઝી સાર ।
નોંઘો નાગજી ભક્ત માવજી, ડોસો ગોપો સુતાર સંઘજી ।।૪૯।।
પ્રેમી પ્રેમબાઇ માનબાઇ, મોટા ભક્ત એ સુતાર માંઇ ।
સેજપાલ શાપત રામલ, એહાદિ ભક્ત તેરે અવલ ।।૫૦।।
ભણસારી જેઠો દામોદર, કણબી કેશવ કમો ઠક્કર ।
એહ આદિ ભક્ત બીજા કૈયે, ભજી હરિ રહે ગામ ધુફિયે ।।૫૧।।
શેઠ હંસરાજ હરિજન, ભક્ત ફુલજી જાતિ યવન ।
ભક્ત ભણશાળી હમીર નામ, એહ આદિ ભક્ત રુવે ગામ ।।૫૨।।
હરિજન બાઇ દેવું નામ, વસે સુતાર વથોણ ગામ ।
ક્ષત્રિ ભક્ત કાકોભાઇ કહીએ, એહાદિ જન મંજલે લહીએ ।।૫૩।।
ભક્ત સુતાર છે પુંજોભાઇ, સઇ પુંજો દેશલપુર માંઇ ।
કણબી ભક્ત લાધા આદિ ખરા, વસે જન ગામ સામતરા ।।૫૪।।
દ્વિજ નાગજી પ્રાગજી મલુ, સામજી ને કેશવજી ભલુ ।
નાથો તેજશી સુતાર શ્યામ, કણબી પ્રેમ લખુ વશરામ ।।૫૫।।
ક્ષત્રિ અદોભાઇ કમોદાસ, ભક્ત મોટા માનકુવે વાસ ।
કણબી ભક્ત છે માવજીભાઇ, એહ આદિ નારાયણપુરમાંઇ ।।૫૬।।
કૃષ્ણ રતનો કણબી કહીએ, બહુ ભક્ત બળદીએ લહીએ ।
ક્ષત્રિ સદાબાઇ હરિજન, દ્વિજ લાલજી જગજીવન ।।૫૭।।
કણબિ ભક્ત વશરામ નામ, એહ આદિ જન કેરે ગામ ।
કણબી હરિજન વાલબાઇ, ભજે હરિ મેઘપુરમાંઇ ।।૫૮।।
સારા સતસંગી સરલીમાંઇ, મોટા ભક્ત છે મનજીભાઇ ।
આસો વીરજી રામું રતન, કણબી રામપુરે હરિજન ।।૫૯।।
કણબી ભક્ત છે કચરો નામ, ભજે હરિ રહે દૈસરે ગામ ।
હરજી કાનજી રામ સુતાર, ડોસો ભક્ત ધીણોઇ મોઝાર ।।૬૦।।
ભક્ત સુતાર બાઇ લખમી, પુનડીયે પીતાંબર પ્રેમી ।
માવજી લખધીર સુતાર, માલબાઇ ગજોડ મોઝાર ।।૬૧।।
રામજી ને કુરજી સુતાર, ક્ષત્રિ રાસોજી ભક્ત ઉદાર ।
એક હરિજન જીજીબાઇ, એહાદિ જન બંદરામાંઇ ।।૬૨।।
ભલા ભક્ત કહીએ ભુજમાંઇ, સારા સતસંગી બાઇ ભાઇ ।
ભક્ત નાગર ગણપતરામ, હરિરામ વલ્લભજી નામ ।।૬૩।।
દ્વિજ નરસઇ સુત ભાણજી, લક્ષ્મી દોયે લીધા હરિ ભજી ।
હરિજન છે લેરખીબાઇ, પ્રીત્ય નવીન પ્રભુજીમાંઇ ।।૬૪।।
સૂર્યપ્રભા જેઠી ને ભવાની, એહાદિ ભક્ત બ્રાહ્મણ નાની ।
નાગજી સુત હીરજી સુતાર, સુંદરજી સનેહિ અપાર ।।૬૫।।
ધનજી હરજી જીવરામ, રાઘવજી રણછોડ નામ ।
કુરજી આદિ કહીએ સુતાર, પુંજી અમર પ્રેમી અપાર ।।૬૬।।
સેજું જમનાં ને હરબાઇ, મોટાં ભક્ત એ સુતારમાંઇ ।
સોનીમાં સતસંગી ગોમતી, મોટી મુલીની ભલી ભગતી ।।૬૭।।
મેતા નથુ સુત શિવરામ, હરજીવન બેન લાધી નામ ।
મહામુક્ત દશા એ સહુની, ભક્ત ભોજા આદિ બહુ સોની ।।૬૮।।
ઠક્કર ઉકા બે અલૈયો કહીએ, હરિભક્ત વલ્લભજી લહીએ ।
ભગવાનજી મનજી ભક્ત, રામદાસ ને મુરાર મુક્ત ।।૬૯।।
રતનશી ડોસો હરિજન, ગંગાબાઇ લુવાણા પાવન ।
ભક્ત જીવરામ લીલાધર, મુળજી આદિજન રાજગર ।।૭૦।।
ધન્ય ધન્ય જેઠી ગંગારામ, ભક્ત શિરોમણિ નિષકામ ।
સુત સામજી મુળજીભાઇ, એહ આદિ જન જેઠીમાંઇ ।।૭૧।।
ક્ષત્રિ ભક્ત એક ડોસાભાઇ, હરિજન બીજાં દેવબાઇ ।
ભક્ત રામજી અભુ કલ્યાણ, એહ આદિ જણસાળી જણ ।।૭૨।।
એહાદિ જન બીજાં અપાર, રહે ભુજનગર મોઝાર ।
સતસંગે રંગે રાતાં રહે, મુખે સ્વામિનારાયણ કહે ।।૭૩।।
પૂર્વછાયો-
ધન્ય ધન્ય એ હરિજનને, જેનાં પુણ્ય તણો નહિ પાર ।
આણી હેત અતિ ઉરમાં, ભજે નારાયણ નરનાર ।।૭૪।।
અતિ દઢાવ અંતરમાં, નહિ કામ ક્રોધ લોભ મોહ ।
શોધ્યે ન મળે એક જે, એવા સતસંગીનો સમોહ ।।૭૫।।
સુણી નામ એહ શ્રવણે, જે મનન કરશે મન ।
સકળ કારજ સિઝશે, વળી થાશે પરમ પાવન ।।૭૬।।
ઇતિ શ્રીમદેકાન્તિકધર્મ પ્રવર્તક શ્રીસહજાનંદસ્વામિ શિષ્ય નિષ્કુળાનંદ મુનિ વિરચિતે ભક્તચિંતામણિ મધ્યે હાલારદેશ તથા કચ્છ દેશના હરિજનનાં નામ કહ્યાં એ નામે એકસો ને સોળમું પ્રકરણમ્ ।।૧૧૬।।