પૂર્વછાયો
હે રામશરણ સુણો કહું, ત્યારપછીની કથાય । વડતાલે સોળ દિવસ, રહ્યા છે જગરાય ।।૧।।
પછે ત્યાં થકી ચાલ્યા પ્રભુ, ચાંગે ગયા તે વાર । મોરજ ગામે પધાર્યા છે, ગોકલભાઈને દ્વાર ।।૨।।
અફિણ ખાતા નિત્ય એતો, ઘણા દિવસની ટેવ । મેર કરી મુકાવી દીધું, એક દિવસમાં એવ ।।૩।।
તે ગઢવીએ ભેટ મુકી, પૂજા કરી નિરધાર । પાંચસો રૂપૈયા રોકડા, આપ્યા કરીને પ્યાર ।।૪।।
વળી વાલમજી વિચર્યા, ગયા ચલોડે ગામ । અમીન નથુભાઈને ત્યાં, કર્યો જઇને મુકામ ।।૫।।
ચોપાઈ
જીતબાયે કરાવ્યો ત્યાં થાળ, સ્નેહ વડે જમાડ્યા દયાળ । જમીને ચાલ્યા જગજીવન, જેતલપુરે શ્રીભગવન ।।૬।।
સંત મંડળ આવ્યાં છે ત્યાંય, મળ્યા સ્નેહ કરી મનમાંય । આનંદાનંદ સ્વામી ત્યાં જેહ, મહાનુભાવાનંદ સ્વામી તેહ ।।૭।।
એ આદિ સંતને નિરધાર, ભણવાની આજ્ઞા આપી સાર । બીજે દિવસે શ્રીભગવાન, દેવસરોવરે કર્યું સ્નાન ।।૮।।
સભા કરી વડ હેઠે શ્યામ, બિરાજ્યા સંત સાથે તે ઠામ । પછે સભા સુણે જેમ કાન, એમ બોલ્યા પ્રભુ બળવાન ।।૯।।
સુણો ભક્તજનો આણે ઠાર, ગામડીયે જાવું છે આવાર । ત્યારે બોલ્યા છે ગોવિંદાનંદ, સાંભળો વિનંતિ સુખકંદ ।।૧૦।।
કર્યું તું યજ્ઞ કરવાનું કામ, સામગ્રી કરાવીતી તમામ । પછી તો પધાર્યા નહિ આપ, તેમાં મહેનત પડી અમાપ ।।૧૧।।
નારાયણ મુનિ કે વચન, એમાં શું પડી મહેનત અન્ય । એવા યજ્ઞ કરીયે હમેશ, એમ કહેતા હતા પરમેશ ।।૧૨।।
એમ કહીને જીવનપ્રાણ, પછે યજ્ઞનું કર્યું પ્રયાણ । દેશો દેશ કંકોત્રીયો સોય, લખી મોકલાવી દીધી જોય ।।૧૩।।
સંતમંડળ ને હરિજન, સૌને બોલાવ્યા પુન્ય પાવન । કાશી સુધીના વિપ્ર અપાર, બોલાવ્યા જેતલપુર ઠાર ।।૧૪।।
કર્મકાંડ વિષે હોંશીયાર, એવા આવ્યા હજારો હજાર । ખટશાસ્ત્ર વળી વેદ ચાર, એના ભણેલા જે નિરધાર ।।૧૫।।
એવા બ્રાહ્મણ જે તે વિદ્વાન, આવ્યા જ્યાં બેઠા છે ભગવાન । કર્યો શ્રીહરિયે સત્કાર, વિપ્ર ઉપર કૃપા અપાર ।।૧૬।।
રૂડો મંડપ રચાવ્યો ત્યાંય, લાખો જન બેસે જેનીમાંય । હેમના હળે ખેડાવી ધરણ, યજ્ઞ આરંભ્યો અશરણ શરણ ।।૧૭।।
સુવર્ણ વેદિકાકુંડ સાર, યજ્ઞ મંડપમાં કરી ત્યાર । ચારે વેદના કરે ઉચ્ચાર, એવા બ્રાહ્મણ એક હજાર ।।૧૮।।
વરૂણીમાં વરાવ્યા છે તેહ, યજ્ઞ કામમાં કુશળ જેહ । ગૌમુખી માળા ને આસન, વસ્ત્ર ઉપવસ્ત્ર આપ્યાં ધન ।।૧૯।।
કંકણ મુદ્રિકા આપ્યાં પ્રીત, શુભ મુહૂર્તમાં રૂડી રીત । દેવતાઓનાં નિમ્યાં આસન, વેદ મંત્રે કર્યું આવાહન ।।૨૦।।
બ્રહ્મા વિષ્ણુ ને રૂદ્ર અગિયાર, નવ ગ્રહ વળી સૂર્ય બાર । એ આદિ બીજા યજ્ઞના દેવ, આવ્યા પ્રત્યક્ષ ત્યાં તતખેવ ।।૨૧।।
બેઠા પોતપોતાને આસન, યોગ્ય રીતે વળી ભીન્ન ભીન્ન । શ્રીહરિયે દીક્ષા લીધી સાર, બેઠા યજ્ઞમંડપ મોઝાર ।।૨૨।।
યજ્ઞ કંકણ પેર્યું છે હાથે, સૌની પૂજા કરી દીનાનાથે । પુરૂષોત્તમજી ભગવાન, યજ્ઞ ચલાવ્યો છે બળવાન ।।૨૩।।
કર્યું અગ્નિનું પૂજન ત્યાંય, વેદમંત્રે સ્થાપ્યો કુંડમાંય । કરી આહુતિ ચાલતી જ્યાંય, થયો પાવક પ્રદિપ્ત ત્યાંય ।।૨૪।।
વિપ્ર કરે છે વેદ ઉચ્ચાર, આપે આહુતિ અગ્નિ મોઝાર । સ્વાહાકાર અને સ્વધાકાર, વષટ્કાર અને ઓંકાર ।।૨૫।।
કરી ગર્જના બોલે બ્રાહ્મણ, ઘણા રીઝે છે અશરણ શરણ । જે જે દેવની આહુતિ હોય, પ્રત્યક્ષ આવીને લેછે સોય ।।૨૬।।
યજ્ઞમંડપ ગાજે અપાર, થાય વેદતણા ત્યાં ઉચ્ચાર । દીક્ષા લઈ બેઠા છે જીવન, કરે દર્શન તે સૌ જન ।।૨૭।।
મંત્ર ભણી કરે ઘૃત હોમ, જ્વાલા પોચે છે અગ્નિની વ્યોમ । હજારો મણ ઘૃત હોમાય, તેની શોભા કહી નવ જાય ।।૨૮।।
જમે બ્રાહ્મણ નિત્ય મિષ્ટાન્ન, તૃપ્ત કરે છે શ્રીભગવાન । દેવ બ્રાહ્મણના પ્રતિપાળ, સહજાનંદ સ્વામી દયાળ ।।૨૯।।
યજ્ઞ કરતા થકા તે ઠાર, વીતી ગયા દિવસ અઢાર । પૂર્ણાહુતિને દિવસે સાર, યજ્ઞદેવ પ્રગટ્યા તે વાર ।।૩૦।।
કરસંપુટ કરી પાવન, કરે પ્રગટનું તે સ્તવન । જય અખિલ જગજીવન, અજ અજીત અપરિચ્છિન્ન ।।૩૧।।
જય અગમબોધ અગાધ, તવ નામે થયા સૌ સાધ । જય આનંદ ઘન અપાર, સર્વે અવતારના આધાર ।।૩૨।।
એમ પ્રાર્થના કરી પ્રીત, લાખોજન જોતા રસ રીત । આપ્યું શ્રીહરિને બહુમાન, પછે તે થયા અંતર્ધાન ।।૩૩।।
ઘણા લોકે તે નજરે નિરખ્યા, દેખી પ્રતાપને મન હરખ્યા । વરૂણીમાં છે વાડવ જેહ, સર્વે આશ્ચર્ય પામ્યા છે તેહ ।।૩૪।।
પછે યજ્ઞ પૂર્ણ કર્યો સાર, શ્રીપ્રગટપ્રભુયે તે વાર । દેવ બ્રાહ્મણને રૂડી રીત, સૌને તૃપ્ત કર્યા પૂર્ણપ્રીત ।।૩૫।।
કર્યા ભૂદેવને ત્યાં પ્રસન્ન, ખાનપાનવડે શુભ મન । વિષ્ણુરૂપે આપ્યાં દર્શન, થયા કૃતારથ સૌ જન ।।૩૬।।
નિશ્ચે કરાવ્યો સર્વેને મન, પુરૂષોત્તમપણે પાવન । જાણ્યા બ્રાહ્મણે મન નિદાન, સ્વામિનારાયણ ભગવાન ।।૩૭।।
એમ જાણીને થયા આશ્રિત, ટળ્યા સંશય થયું છે હિત । પછે યોગ્યરીતે મહારાજ, આપી દક્ષિણાઓ શુભ કાજ ।।૩૮।।
કડાં કંઠી સોનાનાં ઉત્તમ, આપ્યાં બ્રાહ્મણને અનુક્રમ । વસ્ત્ર ઘરેણાં તેહજ વાર, ઘટે તેમ આપ્યાં છે અપાર ।।૩૯।।
કર્યાં વિપ્રનાં દારિદ્ર દૂર, શાન્તિ પમાડ્યા છે ભરપૂર । કર્યા દેવ વિપ્રને વિદાય, અખંડ સુખ આપ્યાં સદાય ।।૪૦।।
પછે સંત હરિજન જેહ, દેશો દેશથી આવ્યાતા તેહ । તેને કરાવ્યાં રૂડાં ભોજન, ત્યારે રાજી થયા ભગવન ।।૪૧।।
સર્વે સંતોયે કર્યું પૂજન, ચંદન પુષ્પોથી શુભ મન । હરિજનોએ આપી છે ભેટ, શક્તિ શ્રદ્ધા અનુસારે નેટ ।।૪૨।।
જેતલપુરના હરિજન, સેવાઓ કરે છે તે અનન્ય । વિપ્ર આશારામ દયારામ, ગંગાદાસ કહીએ જેનું નામ ।।૪૩।।
ઠાકોરવાડા ભીખારીદાસ, આશજીભાઈ નામ પ્રકાશ । ગંગામા આદિ ભક્ત અનન્ય, નથી ઉપાસના બીજી અન્ય ।।૪૪।।
ધન ધામ આદિ પરિવાર, સૌ અર્પણ કર્યું તે વાર । એમ જેતલપુર મોઝાર, વર્તાવ્યો છે જયજયકાર ।।૪૫।।
મોટો યજ્ઞ કર્યો નિર્વિઘન, જેતલપુર કર્યું પાવન । પોતાની મૂર્તિને જેણે જોઈ, તેણે નિશ્ચે કર્યો મનમોઈ ।।૪૬।।
શ્રીહરિની પ્રસાદીનું અન્ન, દેવ બ્રાહ્મણે કર્યું પ્રાશન । તેનો મોક્ષ કર્યો રૂડી રીત, નિજ આશ્રિતનો કરી પ્રીત ।।૪૭।।
ઇતિ શ્રીમદેકાંતિકધર્મપ્રવર્તક શ્રીસહજાનંદસ્વામી શિષ્યભૂમાનંદમુનિ વિરચિતે શ્રી ઘનશ્યામલીલામૃતસાગરે ઉત્તરાર્ધે આચાર્યશ્રી અયોધ્યાપ્રસાદજી રામશરણજી સંવાદે શ્રીહરિયે જેતલપુરમાં અતિરૂદ્ર નામનો મોટો યજ્ઞ કર્યો એ નામે પંચાવનમો તરંગઃ ।।૫૫।।