લઈને ગયો મન પ્રાણ રે, માવો મારાં લઈને ગયો મન પ્રાણ રે

રાગ - પરજ દેશી

પદ - ૧

લઈને ગયો મન પ્રાણ રે, માવો મારાં લઈને ગયો મન પ્રાણ રે માવો -

પ્રાણ લઈને વ્હાલે પરવશ કીધી, ભૂલી હું તનડાનું ભાન રે - માવો

જોયા વિના રે જીવલડો જાય છે, થાય છે જો તનડામાં તાણ રે - માવો

નેણાંને આગે કોઈ આણી મીલાવે, સુંદર શ્યામ સુજાણ રે - માવો

પ્રેમાનંદના નાથની છું હું તો, દામ વિનાની વેચાણ રે - માવો

 

 

પદ - ૨

આંખડિયો અકળાયે રે, જોયા વિના આંખડીયો અકળાયે રે - જોયા

રાત દિવસ જોવું વાટ વહાલાની, આંસુડાં ન સુકાયે રે - જોયા

સૂની સેજ જોઈ મંદિરમાં, કાળજડું કોરાયે રે - જોયા

શ્રી ઘનશ્યામ વદન જોયા વિના, પળ પળ જુગ સમ જાયે રે - જોયા

પ્રેમાનંદ કહે તનડું તપે છે, મળવાને મોહનરાયે રે - જોયા

 

 

પદ - ૩

મુખડું જોયાનું હતું નેમ રે, દા’ડી મારે મુખડું જોયાનું હતું નેમ રે - દા’ડી

મુખડું જોયા વિના પાણીએ ન પીતી, ચંદને ચકોર જોતી રે - દા’ડી

વદન જોવાને ઘનશ્યામ વહાલાનું, રહેતી હાજર એમની એમ રે - દા’ડી

કામ ને કાજ ઘરબાર સંસાર મેંતો, મેલ્યો પડતો જેમ તેમ રે - દા’ડી

પ્રેમાનંદનો નાથ જોયા વિના, હવે કરીશ હું કેમ રે - દા’ડી

  

પદ - ૪

કોઈ દેખાડો ઘનશ્યામ રે, મોળીડા વાળો કોઈ દેખાડો ઘનશ્યામ રે - મોળીડા

શ્રી ઘનશ્યામ નારાયાણ મારે, સરવે સુખનો ધામ રે - મોળીડા

એ સારુ ઘરબાર જગત સુખ, સરવે કીધું મેં હરામ રે - મોળીડા

શત્રુ કંપે છે જેનું નામ સુણીને, માન ક્રોધાદિક કામ રે - મોળીડા

પ્રેમાનંદના નાથ વિના સરવે, વ્યાકુળ ગોકુળ ગામ રે - મોળીડા