રાગ - ગરબી
પદ - ૧
ધર્મ કુંવર ઘનશ્યામજી, મારા પ્રાણતણા આધાર; જોઈને જીવુંછું.
તન મન ધન તમ ઊપરે, લઈ વારૂં વાર હજાર. જોઈ૦ ૧
સુંદર મૂર્તિ મોહની, મારા મનમાં ખુંતી રાજ. જોઈ૦
તમ વિના મને કાનજી, બીજું કાંઈ નવ સુઝે કાજ. જોઈ૦ ૨
પાંપણ પર આંટો દઈ, તમે બાંધી પાઘ અનુપ. જોઈ૦
કોટિક કંદર્પ વારણે, લઈ વારૂં એવું રૂપ. જોઈ૦ ૩
ભાલ તિલક શોભે ઘણું, જાણે ભ્રકુટિ કામ કબાણ. જોઈ૦
કમળનયન કટાક્ષમાં, મારા તાણી લ્યો છો પ્રાણ. જોઈ૦ ૪
મધુર મધુર હસવું જોઈને, વાધે પ્રેમ અપાર. જોઈ૦
ત્રિભુવનમાં એવી કોણ છે, જે વશ નવ થાયે નાર. જોઈ૦ ૫
વામ કરણમાં શ્યામ છે, તિલ નિરખ્યા જેવો નીત. જોઈ૦
તિલ જોઈ જમણા ગાલમાં, વાધે પ્રેમાનંદને પ્રીત. જોઈ૦ ૬
પદ - ૨
શી કહું શોભા અંગની, જોઈ લોચનીયાં લોભાય. ચિત્તડું ચોરે છે .
નિરખી નાસાકીરની, મારાં ભવનાં પાતક જાય. ચિત્ત૦ ૧
અધર પ્રવાળાની ઊપમા, જાણે કુંદ કળી સમ દાંત. ચિત્ત૦
ચિબુક્તણી શોભા ઘણી, કંબુ કંઠ જોયાની ખાંત. ચિત્ત૦ ૨
વક્ષસ્થળ વહાલું ઘણું, મને મળવા વાધે પ્રીત. ચિત્ત૦
આજાનબાહુ ઊર ધરી, આવો મળીએ મોહન મીત. ચિત્ત૦ ૩
ઊદરમાંહી ત્રિવળી પડે, ઉંડી નાભી નૌતમ જોઈ. ચિત્ત૦
શ્યામ કટિ સોહ્યામણી, ઊરુમાંહી રહ્યું મન મોઈ. ચિત્ત ૪
જાનું જુગલ છબી જોઈને, મારો સુફળ થયો અવતાર. ચિત્ત૦
પડી પાની નીરખતાં, મારો દૂર થયો સંસાર. ચિત્ત૦ ૫
સોળે ચિહ્ને જુક્ત છે, એવી જુગલ ચરણની જોડ. ચિત્ત૦
અખંડ રહો આવી ઊરમાં, પૂરો પ્રેમાનંદના કોડ. ચિત્ત૦ ૬
પદ - ૩
નવલ સનેહી નાથજી, રૂપાળા રાજીવ નેણ, વહાલા લાગો છો.
હસતા હસતા હેતમાં, બોલો છો મીઠાં વેણ. વહાલા૦ ૧
આંખડલી અમૃતે ભરી, કાંઈ કરુણા કહી નવ જાય. વહાલા૦
ચિત્ત ચોરાણું ચાલમાં, મરકલડે મન લોભાય. વહાલા૦ ૨
આતુરતા નથી અંગમાં, દીસે છે શીલ સ્વભાવ. વહાલા૦
પ્રેમ તણો પ્રવાહ વહે, નેણામાં નટવર નાવ. વહાલા૦ ૩
ભૂધર ભાવિક ભાવના, નથી અર્થાઅર્થી શ્યામ. વહાલા૦
પરમારથને કારણે, પધાર્યા પૂરણકામ. વહાલા૦ ૪
દીન ઊપર દયા કરી, તમે દુર્લભ દર્શન દેવ. વહાલા૦
કલ્પતરુ છો કાનજી, જાણે મોટા મુનિવર ભેવ. વહાલા૦ ૫
કરુણાનિધિ કરુણા કરી, છોગાળા રંગ છેલ. વહાલા૦
પ્રેમાનંદ કહે અખંડ રહો, આંખડલીમાં અલબેલ. વહાલા૦૬
પદ - ૪
ધર્મકુવર શ્રીકૃષ્ણજી તમે ભક્તપતિ ભગવાન, એ વર માગું છું.
દયાનિધિ તમે દાસને, નિત્ય આપો છો એ દાન. એ વર૦ ૧
નિર્વિકલ્પ ઊત્તમ અતિ, એવો નિશ્ચય થાય તમારો. એ વર૦
અલબેલા તમ આગળે, હું અરજ કરું એ સારું. એ વર૦ ૨
માહાત્મ્ય જ્ઞાને સહિત હરિ, એવી એકાંતિકી ભક્તિ. એ વર૦
પ્રીત રહે તવ ચરણમાં, બીજે રહે સદા વિરક્તિ. એ વર૦ ૩
હું માં તમારું ભક્તપણું, હરિ એમાં કોઈ પ્રકાર. એ વર૦
દોષ ન રહે કોઈ જાતનો, એ આપો ધર્મકુમાર. એ વર૦ ૪
તમારા કોઈ ભક્તનો, મારે દ્રોહ કયારે નવ થાય. એ વર૦
સંગ એકાંતિક ભક્તનો, મને નિત્ય આપો મુનિરાય. એ વર૦
દાસ તમારા દાસનો, મને રાખો નાથ હજુર. એ વર૦
પ્રેમાનંદની વિનતિ, સાંભળજો શ્યામ જરૂર. એ વર૦ ૬