રાગ - ગરબી
પદ - ૧
ઓરા આવો મારા લેરખડા લેરી, કીધો તમ સારું મેં જગવેરી. ઓ૦૧
કાજુ નૌતમ જામા જરકસિયા, શોભે પાઘડલી શિર સોનેરી. ઓ૦ ૨
નંગ જડિયલ બાજુ બેરખડા, કર પોંચી હેમકડાં પે’રી. ઓ૦ ૩
તમે રસિયા રંગડાના ભરિયા, મુખ મોરલડી વાતા ઘેરી. ઓ૦ ૪
બ્રહ્માનંદના છેલાછોગાળા, ચાલોચાલ મલપતા ગજ કેરી. ઓ૦ ૫
પદ - ૨
મરમાળા મનમાન્યા માવા, રો’ને આંખડલી આગે આવા. મર૦ ૧
તારાં મનમોહન મીઠાં વેણાં, આવો શ્યામ તમે મને સંભળાવા. મર૦ ૨
નિત્ય વાલમ આવો મારે મંદિરીયે, રૂડી ચાલ ચતુરાઈ શિખાવા. મર૦ ૩
તમે નાવો તો હું નંદજીને ફળિયે, બહુ હેત કરીને આવું બોલાવા. મર૦ ૪
બ્રહ્માનંદના બાળ સનેહીડા, રાખું જોર કરીને નહીં દઉં જાવા. મર૦ ૫
પદ - ૩
વહાલું લાગે મુને મોહન મુખ તારું, છે જો પૂરણ ચંદ્રથકી સારુ.વા૦ ૧
તારા મુખડાંની મીઠી લાવણ્યતા, જોઈ કોટિ કોટિ કંદર્પ વારું. વા૦ ૨
શુભ ગૌર કપોળે તિલ ત્રાજુ, તેમાં લોભાણું મનડું મારું. વા૦ ૩
તારા મુખની શોભા મરમાળા, નિત્ય નીરખી અંતરમાં ધારું. વા૦ ૪
બ્રહ્માનંદ કહે વશ કીધી મુજને, છે જો કોડીલું કામણગારું. વા૦ ૫
પદ - ૪
તારી મૂર્તિ મન માની મારે, હવે શંકા જગની કોણ ધારે. તા૦ ૧
લટકાળા તમને લાડકડા, મેં તો દીઠેલ જમુનાને આરે. તા૦ ૨
મનમોહન સુંદર મોળીડે, તોરા ફુલ તણા ઝુકિયા તારે. તા૦ ૩
શુભ નાસા દીપ સમાન બણી, કાજુ નેણ કમળ કેરે અનુસારે. તા૦ ૪
બ્રહ્માનંદના હાર હજારીડા, હું તો જીવું છું તુને દેખું જયારે. તા૦ ૫