રાગ - ગરબી
પદ - ૧
જનમ સુધાર્યો રે હો મારો, મળિયા નટવર નંદદુલારો; ૧
કરુણા અતિશે રે હો કીધી, ભવજળ બૂડતાં બાંહ્ય ગ્રહી લીધી. ૨
મુજ પર અઢળક રે હો ઢળિયા, કરુણા કરી ઘેર બેઠાં મળિયા. ૩
મન દૃઢ કરિયું રે હો મુરારી, હવે હું થઈ રહી જગથી ન્યારી. ૪
આનંદ ઊરમાં રે હો ભારી, શિરપર ગાજે ગિરિવરધારી. ૫
નિરભેની નોબત રે હો વાગી, કહે મુક્તાનંદ ભ્રમણા ભાંગી. ૬
પદ - ૨
ભ્રમણા ભાંગી રે હો હૈયાની, નથી એ કેને વાત કહ્યાની; ૧
વીતી હોય તે રે હો જાણે, અણ સમજયા મર ઈર્ષ્યા આણે. ૨
જે રસ મુનિવર રે માણે, વાલે મારે સુગમ કર્યો આ ટાણે. ૩
પ્રેમી જનનો રે હો પ્યારો, મુજને મળિયા નંદદુલારો. ૪
મહારસ મુજને રે હો આપ્યો, સંશય ભ્રમ સમૂળો કાપ્યો. ૫
હવે હું મહાસુખ રે હો પામી, મળીયા મુક્તાનંદના સ્વામી. ૬
પદ - ૩
મહાસુખ મુજને રે હો આપ્યું, જોને સંકટ જનમ દુઃખ કાપ્યું. ૧
પુણ્ય પુરવનાં રે હો મળિયાં, મળતા તાપ હૃદયના ટળિયા. ૨
દરશન દુર્લભ રે હો પામી, હવે મારી સકળ વેદના વામી. ૩
આનંદ ઊરમાં રે હો ભારી, હવે હું ન રહું કોઈની વારી. ૪
હરિ સંગે હેતે રે હો બંધાણી, હવે મુને ન ગમે બીજી વાણી. ૫
અખંડ એવાતન રે હો દીધું, કહે મુક્તાનંદ કારજ સીધું. ૬
પદ - ૪
બાંહ્યગ્રહી છે રે હો વ્હાલે કરુણા કરી નટવર નંદલાલે ૧
હવે નહીં કોઈની રે હો ઓશિયાળી, શિરપર વિઠ્ઠલવર વનમાળી. ૨
ભવબ્રહ્માના રે હો સ્વામી, મુજને મળિયા અંતરજામી. ૩
ઘેર ઘેર લોકડાં રે હો કહે છે, મેણું મુને નંદનાનંદનનું દેછે. ૪
લાજ ન મનમાં રે હો આણું, અતિશે ભાગ્યભલું કરી જાણું. ૫
કોઈ વિધિ ન રહી રે હો ખામી, મળિયા મુક્તાનંદના સ્વામી. ૬